‘n Ruk terug het ek met julle die Rogbrood sonder gis resep gedeel en beloof om dit vir 1 brood aan te pas. Wel hier is dit nou uiteindelik.
Ons eet nie so vreeslik baie brood nie en daarom werk die enkel resep vir my beter. Die brood bly nie so lank soos brood met gis in vars nie. Dus bak ek eerder meer gereeld 1 op ‘n slag. Soos ek laas genoem het smaak dit baie anders as brood met gis in, maar ek hou van die sagter tekstuur. Dit maak dit meer geskik vir braaibroodjies. Lees voort
Dis nou al ‘n wyle terug wat ek begin lees het oor die feit dat kitsgis nie baie gesond is vir mens nie. So saam met dit het ek begin loer na suurdeeg brood en die gebruik van Kefir. Dit lyk nie te moeilik nie, maar dis tog ‘n langer proses as om met gis te bak. En so bly ek uitstel om met die resepte te begin eksperimenteer. Eintlik is die groot gelol dat ek nie tyd maak om te gaan soek vir daai Kefir nie. Iewers sal ek moet plan maak!
Intussen het ek uit nood die bakpoeier plaasvervanger ontdek en dit het my laat dink. Ek het immers al gesien hoe ‘n bietjie koeksoda of kakao help om ons brood beter te laat rys. Is dit nie dalk moontlik om die gis heel te vervang met die koeksoda en asyn nie?
En so begin ek toe eksperimenteer. Die eerste probeer slag was ek heeltemal te oorgretig. Die brood rys vir ‘n vale, maar smaak oes van die koeksoda. Dit het nog ‘n paar keer se verstellings gekos, maar deesdae bak ek sonder gis.
