10

Rogbrood en rogbuns sonder gis (vervolg)

9 Jan 2015
Share

‘n Ruk terug het ek met julle die Rogbrood sonder gis resep gedeel en beloof om dit vir 1 brood aan te pas. Wel hier is dit nou uiteindelik.

Ons eet nie so vreeslik baie brood nie en daarom werk die enkel resep vir my beter. Die brood bly nie so lank soos brood met gis in vars nie. Dus bak ek eerder meer gereeld 1 op ‘n slag. Soos ek laas genoem het smaak dit baie anders as brood met gis in, maar ek hou van die sagter tekstuur. Dit maak dit meer geskik vir braaibroodjies.

450 g rogmeel
250 ml melk
250 ml water
2 eiers
30 ml mielieblom
45 ml suiker
15 ml asyn
15 ml kakao (opsioneel – sonder die kakao is die broodjie ligter van kleur en soeter)
10 ml koeksoda
5 ml sout

Voorverhit die oond na 240 grade Celsius.

Meng melk, water, asyn en eiers saam.

Voeg droë bestanddele by en meng goed.

Gooi in ‘n silikon broodpan en bedek los weg met foelie (dit het ruimte nodig om te rys)

Bak vir 30 minute by 240 grade Celsius. Verlaag die temperatuur na 180 grade Celsius en bak vir ‘n verdere 15 minute.

201419

Ek het dieselfde resep al gebruik om hotdog en hamburger “buns” te bak. Ek gebruik foelie om die vorm te skep van die buns wat ek wil maak. Rond (hmm, dalk moet ek eerder se ronderig) of langwerpig. Onthou net die foelie bo-op ook (anders brand dit bo-op). Ek het dit ook al gebruik om 3 groot pizza basisse van te bak (sonder die kakao by).

Laat weet gerus as julle die uitprobeer het.