Posts Tagged With: aktiwiteite tuis

Ontspan tydens die “lockdown”

Ek volg met kommer al die ouers, onderwysers en selfs departement wat maniere vind om skool werk met kinders tuis te doen.

Die eerste ding van dit wat ek glad nie verstaan nie is dat die skool kalender reeds aangepas is. Vakansies later die jaar is korter gemaak en kinders sal dus nie ‘n dag skool mis nie. Nou met die verlengde “Lockdown” tyd mag dit dalk begin lol. Maar feit is dat kinders nou die beste van die vakansie moet maak, want later in die jaar gaan dit knetter.

Maar dis nie die groot probleem wat ek het met almal se geskarrel, en elke 2de Jan Rap en sy maat wat aan ouers iets wil verkoop om tuis te leer, nie. Dalk is dit ‘n tuisskool ding. Die meerderheid tuisskool ouers glo dat kinders se emosionele en fisiese welstand belangriker is as hul akademie. Dit is nie omdat akademie nie vir ons belangrik is nie. Dit is bloot dat ons weet dat ‘n kind nie akademies kan vorder as hy/sy nie emosioneel of fisies goed versorg is nie!

Daar is tonne navorsing wat wys dat kinders nie onder stresvolle omstandighede kan leer nie. Veral langtermyn geheue en probleem oplossing bly woes in die slag. Dit is immers een van ons land se grootste uitdagings. Daar is teveel kinders wat bekommerd is oor wat hul more (of selfs vandag) gaan eet. Of hulle of hul gesinslede veilig is. Hulle kan nie onder sulke omstandighede optimaal ontwikkel nie.

Ongelukkig skep ons meer en meer ‘n omgewing waar die gemiddelde kind heeltemal teveel druk ervaar. Druk as gevolg van assessering, druk van te veel aktiwiteite en ouers met onrealistiese verwagtinge. Maar dis ‘n onderwerp heel op sy eie daardie.

Die feit bly dat kinders met die hele COVID-19 drama en die “lockdown” wat nou gevolg het onseker voel. Op die minste is hul wêreld op sy kop gekeer. En baie ervaar meer spanning as wat mens dalk besef. Dit is onvermydelik in ‘n samelewing wat paniekerig is. Al waaroor almal praat is die pandemie. Hulle hoor ons gesprekke, ons eie onsekerhede. Vir baie gesinne is hierdie ‘n finansiële uitdagende tyd. Al hou jy dit weg van jou kinders gaan hul jou emosies optel. En hoeveel ouers loop nie met vrese en onsekerheid oor die toekoms rond nie?

As ons werklik in ons kinders se beste belang wil optree is dit belangrik om eerder nou te fokus op hul emosionele welsyn. Hulle het nou liefde en aandag nodig. Om op die bank saam met jou op te krul en te luister na ‘n storie. Om saam met jou dinge te doen, hoe eenvoudig ook al! Of dit is om saam kos te maak, of soggens rekke-en-strekke te doen (om al die ingehoktheid tee te werk), of sommer net om saam ‘n bordspel te speel of grappe te maak.

Hoe ons hierdie tyd hanteer gaan bepaal of dit ‘n tyd van trauma en stres vir ons kinders gaan wees en of dit ‘n tyd gaan word waaraan hul terug dink met ‘n warm hart. ‘n Tyd waarin hul herinnering saam met jou geskep het.

Dit beteken nie dat hulle nie tussenin ook kan leer nie. Daar is immers baie om te leer deur bloot ‘n storie saam te lees. Maar selfs as hulle verveeld voel en kies om skoolwerk te doen om die tyd om te kry, bly dit belangrik om die akademie bietjie af te skuif op die prioriteit lys.

Een van die goeie dinge wat uit die tyd van afsondering kom is dat gesinne tyd saam kan spandeer. Wel tenminste die wat nie steeds kritiese dienste lewer nie. (Ek wonder steeds wat die werkends met hulle kinders in die tyd moet doen.)

En as jy nog wonder wat julle als kan doen om die lang dae korter te maak, gaan loer gerus na die lysie van 15 dinge om te doen tydens ‘n vakansie tuis wat ek ‘n klompie jaar terug gemaak het. Die uitstappies is dalk nou na die maan, maar baie van die res kan julle steeds doen.

Daar’s ‘n paar nuwe idees wat ek by die lysie kan voeg:
– Sit en blaai saam met jou kind deur hul baba album en vertel hul meer oor hul geboorte en die dae toe hul kleiner was
– Gaan luister elke dag na ‘n nuwe storie op Luistervink Stories.
– Sluit op Telegram aan by Edusense se Joernaalgroep by
https://t.me/joinchat/AAAAAFSrxxLq5M7K9olYWg aan en leer van diere en maak saam skootboeke.

Categories: Alles in 'n dag, Uncategorized | Sleutelwoorde: , , , | 1 Kommentaar

Benut die COVID-19 “vakansie”

Ek weet met die skielike lang vakansie is baie ouers bekommerd dat hul kinders se skoolwerk gaan agter raak. As jy wel in die tyd self kan tuis wees is dit die ideale tyd om dit wat die kinders by die skool geleer het prakties te maak en so te verseker dat hulle ‘n voorsprong in die nuwe nuwe kwartaal het.

Meting is iets waarmee kinders dikwels sukkel. As hul dit egter eers prakties gedoen het is dit soveel makliker om te verstaan. Hier is ‘n paar idees om dit tuis te doen.

Meet verskillende voorwerpe. Jonger kinders kan voorwerpe meet deur hul hand of voet as maatstaf te gebruik. Ouer kinders kan ‘n liniaal of maatband inspan. Om dit meer pret te maak kan julle ‘n plan van ‘n vertrek in die huis teken. Meet die vertrek se grootte en meet dan die verskillende meubelstukke en teken dit op skaal op die plan. Of as julle bietjie vars lug soek, maak ‘n plan van die tuin met die verskillende beddings ens. Vir ekstra opwinding gebruik die plan om ‘n skattejag te hou!

IMG_9514

‘n Plan wat my knaap van sy groentetuine geteken het

In die kombuis is daar nog meer geleentheid vir meet. Natuurlik is bak en brou ‘n lekker manier om dit te doen. Tog kan julle selfs sonder bestanddele dit doen. Gebruik ‘n kombuisskaal om verskillende voorwerpe te weeg. Meet ‘n paar voorwerpe en kyk dan wie kan skat wat die ander gaan weeg. Of neem ‘n maatkoppie en verskillende houers. Gooi 1 maatkoppie vol in elke houer. Is die houers ewe vol? Hoeveel maatkoppies sal dit neem om ‘n spesifieke houer vol te maak?

By die wasbak draai die kraan ‘n klein bietjie oop. Span nou ‘n stophorlosie in en kyk hoe lank dit neem vir verskillende houers om vol te loop. Julle kan vooraf skat hoe lank julle dink dit gaan neem. Hoekom neem dit langer vir party houers om vol te word as ander? Gooi die water oor in ‘n maatbeker, sodat hul kan sien wat die volume verskille is.

Ek het ook ‘n paar gratis produkte beskikbaar wat julle tuis kan inspan by https://lomi.co.za/sommer-pret/. Die skakels is in onderste helfte van die blad.

Nog ‘n maklike aktiwiteit om te doen is voorlees. Nee, dit is nie net om die tyd om te kry nie. Voorlees bou kinders se woordeskat en taalbegrip. Daarby help dit empatie ontwikkel en skep dit geleenthede om interessante gesprekke te hê. In alle vakke is leesbegrip belangrik, so met die eenvoudige aktiwiteit gee jy hul ‘n hupstoot vir elke liewe vak (ja, selfs wiskunde).

Dit is ook nie net vir voorskoolse kinders nie. Jy kan selfs vir jou tiener voorlees. Juis vir hulle is dit handig om aan ander idees bloot gestel te word en daaroor gesprekke te voer. Hulle word ook blootgestel aan goeie taalgebruik en kan hoor hoe woorde uitgespreek word wat hulle dalk nog net op papier raak geloop het.

Ons lees op die oomblik Gelofteland van FA Venter. Buiten dat dit ‘n terugblik op die geskiedenis is is dit goed om te besef daar was ‘n tyd wat mense met minder moes klaar kom. Waar hul ook afgesonder was en siektes dikwels tot grootskaalse sterftes gelei het. Ons kon ook al lekker gesprekke hê oor wat die invloed van die gebeure op die ongeveer 180 jaar daarna was. Hoe dit steeds ‘n invloed het op ons land se mense en hul verskillende perspektiewe. Ons kon praat oor die goed en sleg wat voortgespruit het uit die Groot Trek. Oor kultuur verskille en hoe ons dieselfde situasie verskillend interpreteer vanuit daardie kultuur en agtergrond.

As jy soek vir idees van goeie boeke om voor te lees gaan loer gerus na Die wonder van lewende boeke waar ek die boeke deel wat ons geniet het en uit geleer het.

Een van die grootste pluspunte van die huidige COVID-19 situasie is dat ons tyd saam met ons geliefdes kan spandeer. So dikwels as ons tyd saam het gaan doen ons goed. Natuurlik is dit goed om saam op uitstappies te gaan, tog is dit maklik om in die proses steeds by mekaar verby te leef. Om nie regtig diep en betekenisvolle gesprekke te hê nie. Nou is egter die ideale kans om mekaar beter te leer ken en verstaan. Nie net ouers en kinders nie, maar ook boeties en sussies. In ons samelewing is kinders geneig om meestal tyd saam met hul porteurgroep te spandeer. Nou het hul weer die geleentheid om buite daardie raamwerk te beweeg.

Natuurlik is dit ook ‘n goeie kans om bietjie “huishoudkunde” vaardighede te ontwikkel. Met die druk van huiswerk en sport na skool het baie gesinne nie tyd om saam kos te maak of saam huis skoon te maak nie. Nou kan julle saam die aktiwiteite aanpak. Dis handige lewensvaardighede en help beslis om ‘n dag tuis korter te maak.

Sterkte vir almal wat tuis vasgevang is. Dis maar vir ons tuisskolers ook ‘n aanpassing. Ons “skool” mag dalk tuis gebeur, maar ons is immers ook gewoond daaraan om dikwels rond te rits na sport en om op uitstappies te gaan en te gaan kuier by vriende. Om elke dag tuis te spandeer is ook nie vir ons normaal nie.

NS. Pasop vir teveel skermtyd. As mens so tuis is is dit maklik vir kinders om die grootste deel van die dag voor ‘n skerm deur te bring. Dis glad nie produktief of goed vir hulle nie. Maak sommer nou vroeg in die “vakansie” reëls rondom hoeveel tyd hul voor ‘n skerm mag deur bring, sodat daar hope tyd vir ander dinge kan wees.

Categories: Alles in 'n dag, Uncategorized | Sleutelwoorde: , , , | Lewer kommentaar

Blog at WordPress.com.