Posts Tagged With: Wiskunde in Afrikaans

V&A: Wiskunde vir die intermediêre fase

Ek kry dikwels navrae via die webjoernaal en het gedink om van die antwoorde met julle te deel.

My kinders, amper 12 jarige seun en amper 10 jarige dogter, is middel Februarie uit onderskeidelik Gr4 en Gr5 in hoofstroom skool uitgehaal.  Ons is op die oomblik nog besig met die “deschooling” proses.

Ek wil graag ‘n Afrikaanse wiskunde program gebruik vir hulle.   Ons het aanvanklik na MUS gekyk, maar dis engels….

Kan jy my asseblief lei in die volgende:

1.       Tot op watter ouderdom (Graad) sal ek die boekies kan gebruik?

2.       Werk die boekies ook soos die KABV Kirrikulum wat met ‘n spiraalmetode werk, of bou die een konsep op die ander?

3.       Met watter boekie begin ons?  Alhoewel my kinders al “groot” is, weet ek dat daar veral by Wiskunde Konsepte ‘n GROOT gaping is.

4.       Het ek enige addisionele hulpbronne nodig saam met die Somme(r) Pret reeks?  Kan ek NET dit gebruik vir Wiskunde?

Ons het self eers begin met MUS. Ek is mal oor hulle benadering, maar omdat ek ook glo moedertaal onderrig is bobaas het die vertaal werk nogal baie geraak. Aanvanklik was dit makliker, want hul kon nie Engels lees nie, so ek het maar net by gesit en dit in Afrikaans gelees (en nooit die DVD’s gebruik nie). Maar hul het meer selfstandig begin werk en kon later self Engels lees, so sou aangaan op hul eie (wat ek nie gevoel het die ideaal is nie). Plus MUS is duur. Selfs al koop jy net weer die werkboeke vir ‘n 2de kind.

Somme(r) Pret is egter nie ‘n losstaande kurrikulum nie. Die idee was om alternatiewe aktiwiteite te skep wat meer pret is as die gewone droë bladsye en bladsye van somme (wat meeste kinders se moed breek voor hul nog begin het). Die fokus is kernvaardighede wat hulle moet bemeester. In Engels kon ek vreeslik baie sulke werkvelle vind, sommige gratis, ander teen betaling. Maar in Afrikaans was dit maar yl. Ek skep dus nou werkvelle vir my eie kinders en hoop dat daar ander is wat ook kan baat daarby.

Die Somme(r) Pret boeke is dus ook nie vir ‘n spesifieke graad nie. Ek het eerder gekyk na watter vaardighede kinders saam ontwikkel. Daarom is Somme(r) Pret Begin vir die jonger kinders wat nog getal begrippe leer, Somme(r) Pret 1 vir graad 1/2 ouderdom, Somme(r) Pret 2 vir graad 3-5 en Somme(r) Pret 3 vir die graad 6+ (vir gevorderde kinders selfs graad 5). Ek is egter so toe gegooi met graad spesifieke navrae dat ek begin het om pret-pakke saam te stel vir spesifieke grade (die eerstes vir graad 4 is nou beskikbaar). Dit gaan maar stadig en ek hoop om oor tyd ‘n groter verskeidenheid te hê. En dan is daar die groot droom om ‘n 3R’s in Afrikaans te skryf met ‘n klompie aktiwiteite en speletjies (maar of ek ooit tyd vir dit gaan kry terwyl my eie kinders nog klein is weet ek nie!).

Vir die grondslagfase is ek oortuig kan mens weg kom deur Dr Ruth Beechick se The 3R’s te lees (die seksie oor wiskunde) en prakties dan met die kinders te werk en aan te vul met hulpbronne soos my Somme(r) Pret en Pret-pakke. Graad 4+ raak dit effe meer moeilik. Die naaste wat ek nog raak gelees het wat konsepte verduidelik (eerder as om die KABV spiraal benadering te volg) is Wiskunde op ‘n drafstap (Somme’ Gedagtes: My Boek en Werkkaarte). Ek het egter nog nie self die boek in die hand gehad nie, maar dit lyk vir my soos ‘n oulike hulpbron wat mens dan net self weer kan aanvul.

Vir my eie graad 5 gebruik ek Kitsreken (Platinum gee dit deesdae uit). Dis net 80 A5 bladsye. Dus nie so oorweldigend nie, maar dit dek al die temas in KABV. Ek gebruik dit dus om te kyk met watter konsepte hy sukkel en fokus dan net op die. Ek kan nie insien hoekom hy 10 bladsye van dieselfde ding moet doen as hy reeds iets gesnap het nie. Saam met die boeke is ekstra aanlyn hulpbronne vir kinders wat meer oefening nodig het en ook vir die wat ‘n groter uitdaging soek (www.platinumkitsreken.co.za/). Die boeke bevat egter geen verduidelikings nie. Daar doen PracMaths (http://systemmaths.co.za/) beter. Hulle oordoen dit half – hulle verduidelik telkens verskillende metodes hoe om dieselfde probleem mee op te los. Moet asseblief nie as julle dit gebruik alles probeer doen nie, maar kies die metode wat vir jou kind sin maak en doen net dit! My eie kinders het egter die hoeveelheid werk absoluut oorweldigend gevind. Ek hou dus die boeke as verwysing om net te help met konsepte waarmee hulle sukkel.

Ek sou jou sterk aanbeveel om eerder ‘n paar grade terug weg te spring en ‘n goeie fondasie te bou en dan aan te beweeg. Wiskunde bou op mekaar en meeste kinders se probleme lê in die grondslagfase. Die skool beweeg so vinnig dat hul dikwels nie konsepte werklik verstaan nie, maar bloot memoriseer. Aanvanklik kom hul weg met memorisering, maar soos hul ouer raak spook hul meer, omdat die konsepte belangriker is as die geheue werk. Dit beteken nie dat hulle ure by ‘n tafel hoef te sit en werk nie. Inteendeel gaan praktiese alledaagse toepassings hulle meer baat. Bak en brou saam sodat hulle kan weeg en meet, doen saam houtwerk sodat hulle kan meet en pas, self uitwerk hoe laat dit is of hoe lank voor die volgende ding, afstande uit werk (of hoe lank mens nog moet ry aan x km) as jul iewers heen ry, laat hulself lekkers verdeel, betaal as hul gaan inkopies doen, speel-speel inkopies tuis doen ens. Jy gaan verstom staan hoeveel meer hul so leer 🙂

Geniet julle nuwe avontuur en sterkte vir al die besluite. Dis nogal oorweldigend aan die begin.

Advertisements
Categories: Graad 4, Graad 5, Uncategorized, wiskunde | Sleutelwoordw: , | Lewer kommentaar

Create a free website or blog at WordPress.com.