21 Jul 2022
Share

My wêreld het induie gestort. Dit is in elkgeval hoe dit voel. My rekenaar se hardeskyf het gegroet.

Sonder waarskuwing of ‘n ordentlike vaarwel, het hy my net in die steek gelaat.

Onnodig om te sê is alles nie ge’backup’ nie en het ek maande se werk verloor.

Tans werk ek deur die fases van rou. Eers moet ek ‘n nuwe hardeskyf kry en van voor begin. Die stukkies wat ek het bymekaar maak. En dan die moed bymekaar skraap om voor te begin.

Buiten al my kreatiewe werk wat verlore is en admin wat in ‘n absolute nagmerrie ontaard het, voel ek die verlies van al die foto’s en videos van my kinders.

Die digitale kuns van my dogters. Almal se leeslyste. Die take, punte en projekte van my knaap. Die stories waarmee my jong skryfster besig was. Fonts en clipart wat ek bymekaar gemaak het. Drie groot produkte waarmee ek besig was vir my kinders en die winkel.

Als net “poef” weg. Tot niet. Asof dit nooit bestaan het nie.

So as ek tans stadig reageer, weet net ek spook nog sonder my rekenaar. Ek is nie die werk van jou foon af tipe nie. So dit is vir my ‘n geweldige uitdaging. En julle gaan maar geduld moet hê vir nuwe produkte. Ses maande se werk en veel langer se ekstras wat daarin moet gaan is verlore.