Posts Tagged With: konkrete wiskunde

Vraag: Graad 3 sukkel skielik met wiskunde

Ek kry dikwels navrae via die webjoernaal en het gedink om van die antwoorde met julle te deel.

My graad 3 kind sukkel skielik met wiskunde. Hoe kan ek haar help?

Dikwels met die jonger kinders is dit een van 2 goed wat lol met wiskunde. Baie van die werk beweeg te vinnig na abstrak (12+4=), terwyl kinders eers konkreet (met fisiese voorwerpe) werk, dan begin visualiseer (in hul kop prentjies maak om die somme te doen) en dan eers veel later begin hul abstrak dink. Ons verwag dikwels net te vroeg van hulle om die sprong na abstrak te maak (met die gevolg dat hul bloot dit memoriseer ipv om dit te verstaan). Die 2de dinge wat lol is dat die werk oorweldigend lyk. Bladsye vol bv optel somme onder mekaar breek sommer vinnig hulle moed.

Sy gaan waarskynlik blom as jy haar meer konkreet en prakties laat wiskunde doen (soos om lekkers te deel, self te besluit hoeveel ekstra eetgerei nodig is as julle besoekers het, te help met bak en brou en so met mates te werk ens) en deur speletjies. Daar is ongelooflik baie wat kinders kan leer in die proses. Plus dikwels verstaan hul dit op die lang duur beter.

Onthou ook daar is ‘n fyn balans tussen uitdaag en vaslegging. Daar moet uitdaging wees om wiskunde interessant te hou. Maar dit moenie so uitdagend wees dat sy nie eers wil probeer nie. Wissel dit af met konsepte wat sy reeds verstaan om vaslegging te bevorder en ook vir haar te wys dat sy reeds baie bereik het.

 

 

Advertisements
Categories: Graad 3, Tuisonderrig, Uncategorized, wiskunde | Sleutelwoordw: ,, | Lewer kommentaar

Vraag: Hoe help ek my graad 1’tjie

Ek kry dikwels navrae via die webjoernaal en het gedink om van die antwoorde met julle te deel.

Hoe help ek my graad 1’tjie wat spook met wiskunde? Hy verstaan glad nie die * + 1 = 4 tipe somme nie.

Die belangrikste is op die oomblik konkreet met hom te werk. (Ek hoor net laas week van ‘n graad O juffrou wat baklei met die kinders wat op hul vingers tel. Ek wil haar ‘n pak slae gaan gee. Sy het geen benul van kinderontwikkeling nie!).

Kinders moet eers konkreet wiskunde oplos (fisiese items gebruik soos blokkies om bymekaar te tel), voor hulle in hul kop somme kan begin doen (hulle sien eintlik  prentjies in hul kop) en eers daarna kan hul abstrak begin werk (waar jy nie meer aan 3 as 3 appels/kolle/blokkies dink nie maar bloot ‘n begrip het van 3). Kinders verskil en party gaan gouer in ‘n volgende fase as ‘n ander, maar feit is dat tot ongeveer 11 moet kinders hoofsaaklik konkreet werk.

Skole het so obsessief geraak oor assessering op papier dat hul glad nie meer kinders se ontwikkeling in ag neem nie. Met die gevolg dat meeste kinders spook met wiskunde (nie omdat hulle dit nie verstaan of kan doen nie, maar bloot omdat hulle dit nog nie abstrak op papier kan uitdruk nie).

Ruk dus lekkergoed, blokkies, klippies, karretjies uit. Maak nie regtig saak wat nie. Maar laat hy met dit by tel, aftrek, die verdeel ens.

Jy kan vir hom verduidelik dat die = is soos ‘n skaal. Ken hy nog ‘n outydse skaal wat oorhel na eenkant as daar meer aan die eenkant is? Met somme wil ons hê die skaal moet gelyk hang, beide kante moet dieselfde hoeveelheid in hê. As jy ‘n speel skaal het kan jy vir hom wys wat jy bedoel. As jy bv 5 blokkies aan die eenkant sit en net 1
aan die ander kant gaan dit oorhel na die 5 kant. Hoeveel blokkies moet jy dan bysit, sodat dit gelyk is?
Of bou ‘n trein van blokkies/klippies (se maar weer 5). Jy wil hê dat die “trein” aan die ander kant van die = net so groot soos die eerste is. Sit nou onder die eerste “trein” 1 blokkie/klippie. Hoeveel blokkies/klippies moet hy by sit om die 2 treine ewe lank te kry? Hy moet eers dit fisies by sit om te sien wat gebeur en kan dan tel dat dit 4 is.

In julle dag kan jy begin soek vir plekke waar hy wiskunde kan gebruik. Dink byvoorbeeld aan wanneer julle tafel dek. Vra hom hoeveel mense julle is en hy kan dan gaan uit tel hoeveel messe en vurke nodig is. Jy kan dan vra as ouma en oupa kom kuier (of wie ook al) hoeveel gaan ons dan met uitsit. Of as julle lekkergoed koop, gee vir hom die pak sodat hy dit gelyk verdeel vir almal wat moet kry (een vir jou, een
vir my, een vir mamma). Hoeveel lekkers bly oor?

Sulke goed oefen die begrippe in en gee hulle ook ‘n idee hoekom hulle
dit by die skool leer.

Categories: Graad 1, Uncategorized, wiskunde | Sleutelwoordw: , | Lewer kommentaar

Create a free website or blog at WordPress.com.