19 Feb 2012
Share

Ons het ‘n heerlike familie ete agter die rug. Met die lag ons al te lekker vir die oulike sê-goed van die jong klomp. Dis tog te lekker om te hoor hoe skeef en krom party woorde uitkom. En nog beter die wat hulle self opmaak.

 

Ons pop het nogal die gewoonte. Sy is mal daaroor om name in woorde in te werk. So het die maltabella pap Lisabellapap geword (Lisabella is haar niggie) en rabarber sap het Bernardsap (uit “Moenie vir Bernard soen nie!”) geword. Dit bly ook nie daar by nie. Die Afrikaans en Engels word sommer so deurmekaar gegooi. Wie het nou twee woorde vir dieselfde ding nodig. Sy praat nie van ‘n sambreel of ‘n “umbrella” nie. Dis sommer net sambrella. Dis ook nie ses of “six” nie, nee dis seks. Ek hoop nie daardie een haak vas nie, want dit kan vir rooi-wang oomblikke sorg.

Ek onthou nog op die ouderdom het ons knaap eendag van ‘n hond wat ons in die park tee gekom het gepraat as doglessa. Eers ure later het ek agter gekom dis sy manier om Jack Russel te probeer sê!

Dis ook nie net my twee wat dit doen nie. Die niggie praat van ‘n Landylongs en ons pop van ‘n daddyslongslegs. En tussen die 2 en ons knaap het die arme daddylonglegs spinnekoppe nie ‘n kans nie. Een van hulle is al ewig met ‘n spinnekop in die hand. Gewoonlik het hulle die aan ‘n poot of twee beet. Die helfte van die spinnekoppe in my huis kort ‘n been of twee, soms selfs drie! Ten spyte van die mishandeling bly die ag been rakkers hulle tuis maak in elke moontlike hoek of gaatjie.