Die laaste 9 weke het ons ‘n kuiergas. Baie meer soos ‘n nuwe lid van die gesin, maar realiteit is dat hy iewers groener weivelde gaan soek. Dis ‘n kolgans kuiken, Kolle.
As mens tot ‘n baba voëltjie se redding wil kom is kolganse seker van die maklikste om groot te kry. Hulle eet van dag een af self en nou na 9 weke is hy al amper volgroei. Die uitdaging is om daai lyfie die eerste week of wat warm te hou en te verseker dat hy nie ‘n happie vir ‘n ander gedierte word nie.
Kolganse is familie voëls. Hul behoefte aan iemand naby is ongelooflik. Ons het heelwat pret saam met die gansie al gehad, maar dit raak ook uitputtend om aan sy sosiale behoeftes te voldoen. Ek haal my hoed af vir Kolgansma’s. Dit kan nie maklik wees om ‘n paar van die gansies saam groot te kry nie.
Kolle en ons hond is groot maats, miskien eerder soos familie. Nie dat ons seker is wie dink hulle is wie nie. Die hond eet saam aan die gans se hawer en gras en die gans lê saam met die hond op die gras en knibbel aan ‘n tak. 
Ek het ‘n storie geskryf oor Kolle se eerste weke saam met ons gesin. Dis te koop en het hope prente in om in te kleur en heelwat om te leer van kolganse.
Wie weet eendag skryf ek dalk die res van Kolle se storie.
Ai, die sorgsaamheid in jou seuntjie se lyftaal is so aangrypend mooi!
Hy’s vreeslik dierbaar. Ek dink nie ek sou die eerste weke oorleef het as hy nie so baie gehelp het nie.
Toe oorleef jy en Kolle altwee! Mense wat wilde voeltjies grootkry, is baie besonders.
Ag kyk nou net hoe mooi! Hou ons asb op hoogte!
Sal probeer!
In die Botaniese tuine hier naby ons, is ‘n klomp kolgans families. Dit is altyd van die beste tydverdryf om hulle te sit en dophou.
Dis so pragtig om te lees hoe julle vir die kleintjie sorg.
Hulle is beslis interessante voëls, Elize. Ek het nooit besef hoe slim hulle is nie.
Wil graag uitvind wat eet Kolganse, ons het een wat ons uit die nes groot maak. Hy/sy is nou 4 weke en is te oulik. Volg my oral in die huis.
Klein kolgansies eet groengoed (soos gras, surings, ens), goggas en slakke en jy kan aanvul met grane as hy/sy nie genoeg self geëet kry buite. Daar is blykbaar kos mengsels spesifiek vir watervoëls, maar ons Agrimark het net kuikenvoer (as jy die gebruik moet dit nie aanvullings by hê nie). Dit was vir ons net makliker om self ‘n mengsel te maak van hawer, maltabela (Kolle was gek oor die, veral in water) en sopmengsel (die wat jy by die lensies, boontjies ens in die supermark koop). En hou genoeg water byderhand, want hulle eet dit nie droog nie.
Hier nou onlangs so ñ baba Kolgans by ons aangekom. Hy is te dierbaar. Baie tuis in die huis. Mors net bietjie baie. Nou soek ons vir hom ñ maaitjie sodat hy nie so alleen is nie, en om hulle dan saam buite groot te maak. Kan iemand help asb?
Nadia Loubser