Posts Tagged With: hoogtepunte

Hoogtepunte van 2021

Hierdie jaar kry julle weer net ‘n blitsige kykie na ons jaar wat verby is.

Ons het weer die oujaar afgesluit met ‘n heerlike gesins-spele en oujaarsaand pret.
Die kinders was so bly dat hulle weer atletiek kon doen.
Veral my jongste het Edusense se Adventures of Bob White boekklub geniet.
Daar was weer lockdown oefen by die huis.
Ons jongste was in die sewende hemel dat sy ook nou kon gimnastiek kompetisies doen.
Grootsus het ‘n goeie kompetisie seisoen gehad. Sy’t eerste in die Weskaap gekom vir Artistiese gimnastiek en tweede vir tuimel. En by die SA’s met ‘n 2de plek vir balk en 5de algeheel weg gestap vir Artisties en 6de vir die Tuimel.
Ons oudste het net so ‘n goeie seisoen gehad. Hy was ook eerste in die Weskaap vir Artistiese gimnastiek. En by SA’s het hy 3de vir mansbrug en 4de algeheel geëindig.
Saam met die SA’s kon ons ‘n heerlike kort vakansie op die plaas inwerk en by familie kuier wat ons baie jare laas gesien het.
Die kinders het weer aan SACSSA se virtuele landloop deelgeneem.
Hulle het aan ‘n hele klomp olimpiades deelgeneem en so goed gedoen. In die World Maths Day het ons oudste eerste in SA gekom vir graad 8. Hy’t ook 2de vir graad 9 en 3de vir graad 8 gekom in die Living Maths Olimpiade. Middel sus het deur gedring na beide Wits en SAMC se wiskunde olimpiades en heel dapper SAMC gaan skryf tussen 150 ander graad 4-7’s. Haar eerste belewenis van ‘n skool. En kleinsus was diep trots op haar eerste plek in die Living Maths Olimpiade. Hulle het al 3 ook pragtige punte in die Conquesta Olimpiade gekry. Hulle het Platinum (88%+) vir al hul vakke gekry, buiten vir wiskunde waarvoor ons knaap 82% en middelsus 84% gekry het.
Die twee meisies het ook aan FAK se Afrikaanse Ekspo deelgeneem,. Hulle het goud vir hul voordrag en resensie gekry. En middelsus was ook die resensie wenner vir graad 6.
Die drie het ‘n stalletjie gehad by ons markdag en elk hul eie produkte verkoop.
Ons het weer saam met maats konsert gehou. Die kinders was bly om weer met fisiese musieklesse te kon begin.
Ons het lekker eksperimente gedoen.
Ons het ‘n week oue lemoenduifie gered wat kinders iewers uit ‘n nes gedief en aan sy stert rond gedra het in die straat. Die is nou al mooi groot en probeer gereeld kos van iemand se bord steel as ons buite eet.
Ons knaap is altyd besig om een of ander ding reg te maak. Hy het ook die heerlikste pampoen oes gehad en die jaar geleer om ‘n 3x3x3 “rubik’s cube” blitsig op te los en het amper al ‘n 5x5x5 opgelos.
Middelsus het leerwerk geleer doen as sy nie met haar neus in ‘n boek gesit het nie.
Ons jongste is altyd besig om prente te teken of verf.
Of sy is met iets anders kreatief besig soos om vir haarself ‘n pophuis te bou of leerwerk saam met middelsus te doen. Sy’t ook haar eie verjaarsdagkoek versier die jaar.
Ons het van nog ‘n hele klomp lande geleer.

Ons het heerlike boeke gelees en na stories geluister. Ons gunsteling die jaar was Gerald Durrell se My family and other Animals en Birds, Beasts and Relatives. Heerlike snaakse stories oor Korfu se mense en natuurlewe. Ons het Exploring Creation se Botany en ‘n goeie stuk van General Science gedoen. 15 Minute Afrikaans gedoen en weer van ‘n klomp komponiste geleer.

Ons kon die jaar afsluit met een van hul gunsteling aktiwiteite, bou met tandestokkies en Senties.

En beste van als kon my sus vir die eerste keer in 3 jaar kom kuier.

Categories: Alles in 'n dag, Graad 2, Graad 6, Graad 8, Tuisonderrig | Sleutelwoorde: , , , | Lewer kommentaar

Hoogtepunte van 2020

Soos hul sê agterosse kom ook in die kraal. 2020 voel soos eeue terug en ek kom nou eers daarby uit om ons hoogtepunte van die jaar te laai.

Ek het einde laas jaar al ‘n lysie gemaak van wat ek wou laai en het die intussen weer verloor. Julle sal dus maar met ‘n beeld weergawe tevrede moet wees en kans is goed dat ek dinge gemis het.

Wat ek nie in beeld kan deel nie is al die aanlyn dinge wat ons beleef het agv die grendelstaat. Ons het SpaceX se vaart na die Internasionale Ruimte Stasie gevolg, heerlike die ballet stukke “Swan lake” en “Nutcracker” gekyk en Phantom of the Opera en Andrea Bocelli geluister/kyk.

Ons het weer die Nuwe Jaar ingewag met ‘n gesinspele en aand van pret en plesier
Ons was bevoorreg genoeg om te gaan luister na die SU filharmoniese orkes. Wat ‘n belewenis!
Ons het die Rupert museum besoek as deel van die Woordfees en Pierneef en van Wouw se kunswerke beleef. Die kinders was gefasineer deur die akkedis detail op een van van Wouw se beeldhouwerke.
Gelukkig het ons vroeg konsert gehou (min wetend dat ‘n tweede konsert nooit sou kon plaasvind nie). My introvert dogter het ontpop in ‘n seremoniemeester! Later in die jaar het ons ‘n Kroontjiekiem konsert gehou. Ons vriende van naby en ver het videos van hul items in gestuur wat my oulike sus saam geredigeer het en almal in hul eie huise na kon kyk. Dit was heerlik om al die gesigte weer te sien na al die tyd in die grendelstaat.
My 3 het ure en ure van saam speel gehad.
Vir 3 maande lank het die drie elke dag getrou geoefen. Hulle is by verskillende gimnastiek klubs en ons het die 2 se Coronastics en Movid programme gekombineer, sodat hulle saam kon oefen.
Die drie het die tweede helfte van die jaar elke maand aan ‘n virtuele landloop deelgeneem. Dit was heerlik om te sien hoe hul tye verbeter het. Ons oudste het 4 km in 19:43 gehol, middelkind 3km in 14:52 en jongste 1km in 5:20 in die finale landloop van die jaar.
Ons middelkind het die grendelstaat benut om stories en liedjies te skryf wat sy begin verkoop het by Salomie se Storiehoekie.
Ons het baie dinge onder die mikroskoop ontdek.
Ons gesin het ‘n nuwe lid bygekry. Een wat lekker skade aanrig in die groentetuin!
Die oudste 2 het elke ‘n besigheid in geskryf vir die besigheidsbytjie kompetisie
Hulle het ook resensies geskryf vir Homeschool Beats en ons knaap het die wenresensie gekryf.
Ons het geleer van insekte!
En van 9 nuwe lande.
Dit was vir my ongeloofik met watter oulike idees my meisiekinders se gimnastiek klub vorendag gekom het om hulle gemotiveer te hou deur die deurmekaar jaar. Hulle het tydens grendelstaat ‘n virtuele klubkompetisie gehou, terug by oefening het die seniors ‘n “Challenge cup” gehou en die jaar is afgesluit met ‘n klubkompetisie. Die afrigters het soveel moeite met die meisies gedoen om die jaar ook vir hulle spesiaal te maak.
Klubkompetisie om die jaar af te sluit.
Ons het heerlik uit ons knaap se groentetuin geëet. Hy werk baie hard om die tuin so mooi instand te hou en uit te brei
Al drie die woelwaters se harde werk is beloon met pragtige Conquesta resultate! Hulle het ook baie goed gevaar in die Living Math Olimpiade. Die jongste 2 het onderskeidelik 1ste en 2de in hul graad geëindig en ons knaap het met ‘n 2de plek in sy graad en ‘n 3de plek in die volgende graad weg gestap.
Ons knaap het heerlike projekte gebou deur die jaar van hidrolise stelsels en lego karre wat krag genereer tot rekkie gewere en ‘n afstandbeheerde boot. Hy het DK boeke se Inventor Lab ongelooflik baie geniet en net so baie geleer in die proses. Hy het selfs een van sy eksperimente gedeel.
Ons jongste is mal oor kuns en gaan deur papier teen ‘n spoed wat my asem wegslaan. Ek is egter mal oor haar skeppings.
Middelsus skep ook graag en is besonder lief daarvoor om alles in mikroformaat te doen Hoe kleiner hoe beter vir haar.
Die jaar se harde werk is ook beloon. Middelsus het 2 goud en 2 silwer medaljes gewen by Gimnastiek Suid-Afrika se virtuele nasionale kompetisie.
Ons het die jaar afgesluit met ‘n baie oulike Natuur Adventskalender.
Categories: Alles in 'n dag, Tuisonderrig | Sleutelwoorde: , , | 4 Kommentaar

Hoogtepunte van 2019

So het nog jaar verby gevlieg! Elke jaar voel dit vir my asof ons nie veel bereik het nie. En dan gaan sit ek om ons hoogtepunte neer te skryf en staan verstom. Hierdie uitstappie help my om perspektief oor die jaar te kry. Om nuwe moed vir die nuwe jaar en sy uitdagings te skep. Dis so maklik om terwyl mens in die jaar en sy dinge vasgevang is dit mis te kyk wat ons als bereik het. Lees voort

Categories: Alles in 'n dag, Graad 4, Graad 6, Graad R, Tuisonderrig, Uncategorized | Sleutelwoorde: , , | 1 Kommentaar

Ons 2018 hoogtepunte

Ek het lank gewik en weeg of ek die jaar ons hoogtepunte moet deel. Ek het net met te veel moedelose ma’s gepraat wat voel hulle het nie genoeg bereik die jaar nie. Toe besef ek dat ek elke jaar dieselfde voel. As mens elke dag met jou kinders werk sien jy dikwels nie al die groei so mooi raak nie. Dis gewoonlik eers as ek hier aan die einde van die jaar terug kyk oor die jaar dat ek besef hoe baie ons eintlik gedoen het.

En daarom het ek besluit om wel die te deel. Ek wil elkeen uitdaag om iets soortgelyk te doen vir hulle gesin. Vergeet van vergelyk met ander gesinne. Vier dit wat julle gesin die jaar gedoen het! En gaan loer gerus na die oulike video gemaak deur Marisa Haasbroek en Dr Dr Frank Müller oor 16 Beter maniere om vas te stel of jou kinders vorder .

Lees voort

Categories: Alles in 'n dag, Graad 3, Graad 5, Uncategorized, Voorskool | Sleutelwoorde: , | Lewer kommentaar

Ons 2017 hoogtepunte

Ons jaar het weer afgeskop met ons nuwe jaar vieringe.

201618 Lees voort

Categories: Alles in 'n dag, Graad 2, Graad 4, Voorskool | Sleutelwoorde: , , | 1 Kommentaar

Ons 2016 Hoogtepunte

Die grootste hoogtepunt van my jaar is dat my oudste 2 kinders die wonder van lees ontdek het. Hulle is 7 en 9 en alhoewel hulle 2 jaar in ouderdom verskil het beide hierdie jaar vir die eerste keer ure spandeer om te sit /lê en lees. Hulle het elkeen digby die 100 boeke in die jaar gelees. Sommige boeke het beide geniet, maar oor die algemeen verskil hul belangstellings baie. Natuurlik was daar ‘n klomp kort stories in, maar ook ‘n hele paar waaroor ek vestom was. Ek sou nooit kon dink dat hulle op die ouderdom al van die stories sou lees en geniet nie. Boeke wat vir my by my oudste uitgestaan het was: Pippie Langkous van Astrid Lindgren, Slaaptydstories 1 en 2 van Arthur S. Maxwell, Danda van Chris Barnard, Hy leef van Jenny Tripp, Die groot dierstorieboek van Human, Jakkals wat plante eet, wat wou van Rosalind Kerven, Wit oemfaan van FA Venter, Speurder Proppie van CS Badenhorst en hy het ook elke Kuifie en Astrix en Obelix wat hy sy hande op kon kry gelees.

Lees voort

Categories: Alles in 'n dag, Kunsvlyt, skootboek, Tuisonderrig, Uncategorized, Wetenskap Maandae, wiskunde | Sleutelwoorde: , , | 2 Kommentaar

Ons 2015 hoogtepunte

Dit is ongelooflik om te dink dat nog ‘n jaar amper op sy rug is. Dit beteken dis weer tyd om te kyk na die hoogtepunte van ons jaar, nes laas jaar die tyd

Omdat ek geen idee het waar om te begin nie, kyk ek maar chronologies terug op die jaar.

201414

Lees voort

Categories: Alles in 'n dag, Graad 2, Graad R, Tuisonderrig, Uncategorized | Sleutelwoorde: , , | 4 Kommentaar

Ons 2014 hoogtepunte

So is nog ‘n jaar vinnig besig om leeg te hardloop. Die een, voel dit vir my, is in ‘n oogwink verby. Ek gaan lieg as ek sê dat dit ‘n jaar net van maanskyn en rose was. Met ‘n baba in die huis, wat nog die waarde van slaap moet ontdek, was ons klomp maar heel party dae verlep. Dankie tog dat ons nie die “school run” moes doen nie. Ek is nie so seker of ek dit sou oorleef het saam met die huiswerk en al die ander skool aktiwiteite nie. Ons kon gelukkig ons pas aanpas by almal se energie en konsentrasie vlakke.

Tog was selfs die min slaap ‘n seën. Ek het geleer dat ek meer kan ontspan. Dat my kinders meer leer as ek minder in meng. En dat liefde en aandag baie dinge reg toor. God se genade is genoeg vir vandag en more sal vir homself sorg.

Maar terug na al die hoogtepunte wat ek wil deel. Ons 7-jarige het die jaar afgeskop met sy eerste 200 stuk legkaart. Dit was nogal ‘n uitdaging vir hom. Nou net ‘n paar maande later vra hy dat ons saam ‘n 1500 stuk aanpak en so stuk stuk bou hy dit. Natuurlik kla hy aan die einde dat ek te veel gehelp het en ruk toe weer groot dele uit mekaar en bou dit oor! Hy het dit so geniet dat ons nog ‘n 1000 stuk uit haal. Die is nou al amper klaar en hy het die meeste daarvan self gebou.

2014-11-20-1865 Lees voort

Categories: Graad 1, Kunsvlyt, Ons lees, Tuisonderrig, Voorskool, wiskunde | Sleutelwoorde: , , , , | 8 Kommentaar

Create a free website or blog at WordPress.com.